Akaca

“Pakhoso’ akaca, mo’le ba’na bisa ngabas aba’na dhibik”. Cakna sowara ta’ tao dhari dimma se lako asowara ma sompek badan. Sabban tengnga malem, sengko’ jaga pas nyare kaca. Ce’ seppena pangaterro riya. Sengko’ ya sengko’, daddi aba’na sengko’ dhibi’, polana sengo’ jet banne pamain sinetron otaba drama. Tape seggut engko’ temmoni laen bi’ aba’na engko’ dhibi’. Ce’ bannya’na tengka se tak bisa sengko’ ngarte arapa sengko’ ma’ alako jareya. Ban bannya’ pole pangaterro se moso engko’ tak elakone. Sengko’ daddi ta’ nyaman pole aguli, atengka, ngonggkabbagi essena ate daddi apa bei..
Engko’ apangrasa badan riya benni pole bengko se ekaandhi’ engko’. E dhalemma, bisa daddi egabay mar-kamar se sadar otaba enja’ la mare epakontrak ta’ tao apa otaba sapa. Tang badhan daddi alat tatengka se alonggu se banne engko’ bei. Daddi tang tanang, tang colo’, tang soko, tang mata, tang jila, bisa atengka salaen eparenta moso engko’.
Pangrasan jareya se agabay engko’ akaca. Ja’ sakenga gabay tao sapa bei se maso’ ka dhalem badan reya. Mon la tao, ce’ terrona badhan reya ngusir, angguy kakerrasan otaba ta’ angguy kakerrasan. Tape pangaterro se ce’ rajana rowa agabay engko’ ta’ endha’ nyerra. Pas engko’ nemmo kaca ebakto pangaterro se seppe rowa nosok kakabbi bagiyan badhan anguy ladding. Kabbi bageyan badhan ngalecer dhara. Engko’ apangrasa sake’ se nyaman bakto darah ruwa ngalecer sakeccap gan sakeccap.
Ngaemot ebakto gi’ kene’, engko’ nangis ce’ ranyingnga pas apangrasa nyaman ban tennang marena nangis rowa ambu. Ngemot pole kaleggaan nangis e bakto kene’. Temmoni sengko’ ta’ parcaja apa se kalowar dhari badan rowa dhara otaba aeng mata. Tape sake’ rowa agabay engko’ arassa nyaman se tadha’ bendinganna. Palenagan sake’ ban nyaman rowa dhuwa’ hal se daddi settong rowang kasaddaran. Sabban malem engko’ ta’ ngidda tedung. Ce’ seppena odhi’ rowa. Sapa rowa manossa?? Sabban jam, engko’ mandangg gambarra aba’ se badha eman-dhimman, tape ta’ kennal keya oreng aseng rowa. Ta’ tao malem apa, ojan se toron dhari sore, monyena e ganteng marammi kabadha’an.
Bit-abit badha sowara tok-ngetthok labang. Engko’ ngedingngagi kethogen rowa tamba ranying, tambah bida moso monyena ojan. Engko’ mukkaagi labang.
“Sapa??”
“Sengko’ aba’na ba’na, ca’na lalake’ se mesem manjeng jejjek e bakto engko’ mukka’ labang, Moso engko’ e soro masok. Tape bakto engko’ atanya apa maksodda, sowara se nokthok labang taedhing pole. Engko’ atanya padhana gella’, pas jawabanna padha moso se ekoca’ tamoy se kapeng settong. Engko’ mukka’ labang passanan nyoro masok. Terros nga’na rowa ampe’ pan-barampan pole.
“Apa maksodda areya kakabbi??”
“Sengko’ ban ca-kanca dhateng gabay norodi onjanganna ba’na. ca’na kasaoreng se daddi pangatengnga. “Ca’na ba’na terro atemmua ban kita kakabbin?”
“Daddi, ba’na-ba’na se ngator tang badhan?”
“Ta’ ngator, oreng ediya kakabbin reya sah badha e bandanna ba’na.”
“Ba’na-ba’na kodu tao, tang badhan ta’ terro pole ekennengngi so sapaan bai salaenna engko’. Tang badhan la aguli ban atengka ta’ padha bi’ se engko’ terro. Engko’ lalesso nenggu ce’ bannya’na tatengka se engko’ ta’ terro ban pangaterro se tak ekalako moso engko’.
Oreng-oreng rowa nengngenneng kabbi. Sowara ojan tambah derres. Tape sabellun engko’ ngala’ sadha’, oreng-oreng arowa temmoni maso’ lebat mata, elong, colo’, kopeng, tanang, soko, tabu’ ban se laen sengko’ ta’tao.